सिन्धुली । नेपाली कांग्रेस सिन्धुलीको जिल्ला सभापतिमा उपेन्द्रकुमार पोखरेल विजयी भएका छन् ।
नेपाली कांग्रेसको १४ औं महाधिवेशन अन्तर्गत सिन्धुली जिल्ला अधिवेशनबाट पोखरेल विजयी भएका हुन् । आज भएको दोस्रो चरणको निर्वाचनको मत परिणाम अनुसार पोखरेलले ८ सय ८५ मत प्राप्त गर्दै विजयी भएका हुन् । पोखरेलले उनका प्रतिद्वन्द्वी तथा निवर्तमान जिल्ला सभापति उज्ज्वल प्रसाद बराललाई ४ सय ८ मत अन्तरले पराजित गर्दै सभापतिमा विजयी भएका छन् । बरालले ४७७ मत प्राप्त गरेका छन् । पहिलो चरणमा कुनैपनि उमेदवारले ५१ प्रतिशत मत प्राप्त गर्न नसकेपछि मंगलबार पुन दोस्रो चरणको मतदान भएको थियो । दोस्रो चरणमा कुल १ हजार ३ सय ७१ मत खसेको निर्वाचन अधिकृतको कार्यालयले जनाएको छ । खसेको मत मध्ये ९ मत बदर भएको थियो ।
सभापति पदका लागि भएको पहिलो चरणको निर्वाचनमा उपेन्द्र कुमार पोखरेलले ४ सय ८३, उज्ज्वल प्रसाद बरालले ४ सय २७, खड्ग बहादुर बाईवाले १ सय १, प्रेमचन्द्र दाहालले ३ सय ६१ र विश्नाथ कोइरालाले १६ मत प्राप्त गरेका थिए ।
