काठमाडौं । सिन्धुपाल्चोकका एकसहित ३ जना त्रिभुवन विमानस्थलबाट अवैध सुन र मोबाइलसहित पक्राउ परेका छन् ।
सिन्धुपाल्चोकको भोटेकोशी गाउँपालिका वडा नम्बर ३ का ३९ वर्षीय दावा छिरिङ शेर्पा, रौतहटका ३२ वर्षीय सुनील कुमार साह, मकवानपुरका २८ वर्षीय नवराज परियारलाई प्रहरीले पक्राउ गरेको हो । प्रहरीले त्रिभुवन अन्तर्राष्ट्रिय विमानस्थलबाट १ किलो १ सय ५५ ग्राम सुन र चार वटा मोबाइलसहित उनीहरुलाई नियन्त्रणमा लिएको हो । हिमालय एयरलाइन्स र एयर अरेबियाको विमानबाट दुवई र सारजहाबाट आएका उनीहरुलाई त्रिभुवन विमानस्थलबाट सुरक्षा कार्यालयले विमानस्थलको आगमन टनेल गेटबाट पक्राउ गरेको हो । पक्राउ परेका शेर्पाको साथबाट प्रहरीले मलद्धारभित्र लुकाएर बेलनाकार रुपमा बनाइएको अर्धठोस १ किलो ५५ ग्रामको सुन बरामद गरेको छ । यस्तै, साहको साथबाट चारवटा आइफोन १३ प्रो म्याक्स तथा १÷१ वटा ५० ग्राम सुनको बेरुवा औँठी र सिक्रि बरामद गरेको छ भने परियारको साथबाट एउटा आइफोन १३ प्रो म्याक्स तथा २ वटा ५० ग्राम सुनको बेरुवा औँठी बरामद गरेको छ ।
पक्राउ परेका उनीहरुलाई बरामद सामानसहित आवश्यक अनुसन्धानको लागि त्रिभुवन अन्तर्राष्ट्रिय विमानस्थल भन्सार कार्यालयमा बुझाइएको प्रहरीले जनाएको छ ।
