जिरी (दोलखा) । दोलखाको जिरी नगरप्रमुखका उम्मेदवार गेल्बु शेर्पाले जिरीमा माओवादीको जित निश्चित रहेको बताएका छन् ।
जिरी एफएमको रेडियो कार्यक्रम निर्वाचन केन्द्रितमा बोल्दै शेर्पाले जिरीमा माओवादी कमजोर नभएको भन्दै आगामी स्थानीय तह निर्वाचनमा जित निश्चित रहेको दावी गरेका हुन् । नेकपा माओवादी केन्द्र जिरी नगरकमिटीका अध्यक्ष रहेका शेर्पाले नगरप्रमुख पदका लागि स्वतन्त्र उम्मेदवारी दिएपनि उनलाई पार्टीले आधिकारीक उम्मेदवार बनाइसकेको छ । स्वतन्त्र उम्मेदवारी दिएका कारण आफ्नो निर्वाचन चिन्ह पानीको धारा रहेपनि आफु पार्टीको आधिकारीक उम्मेदवार रहेको शेर्पाले बताएका छन् । नेपाली कांग्रेससँगको गठबन्धन टुटेपनि माओवादी बलियो रहेको उनको दावी छ । उम्मेदवारी दर्ता गर्ने क्रममा कांग्रेसले गठबन्धनको नियम पालना नगरी धमाधम माओवादीको भागमा पर्ने वडाहरुमा पनि उम्मेदवारी दर्ता गरेपछि आफुले अन्तिममा पार्टीकै निर्देशन बमोजिम स्वतन्त्र उम्मेदवारी दिएको शेर्पाले जानकारी दिएका छन् ।
तर, अहिले एकीकृत समाजवादीसँग आफुहरुको गठबन्धन रहेको र माओवादी विगतको तुलनामा बलियो रहेको उनको भनाई छ । शेर्पा गत स्थानीय तह निर्वाचनमा पनि चुनाव लडेका थिए । तर, दोस्रो ठूलो मत प्राप्त गरी पराजित भएका थिए ।
