ओखलढुंगा । ओखलढुंगाका एक युवकको काठमाडौँको कालोपुलमा हत्या भएको छ ।
ओखलढुंगाको लिखु गाउँपालिका –९ घर भई काठमाडौँको कालोपुलमा कोठा भाडामा लिएर बस्दै आएका २० वर्षीय प्रेम महत दर्जीको हत्या भएको हो । उनलाई आफ्नै कोठामा शंकास्पद अवस्थामा मृत फेला पारिएको जिल्ला प्रहरी परिसर काठमाडौँका एसपी तथा प्रवक्ता नवराज अधिकारीले जानकारी दिनुभयो ।
प्रारम्भिक अनुसन्धानका क्रममा महतको हत्या भएको खुलेको प्रहरीले जनाएको छ । उनको धारिलो हतियार प्रहार गरि हत्या गरेर झुण्डाईएको अवस्थामा शव फेला परेको एसपी अधिकारीले बताउनुभयो । उनको शव पोष्टमार्टमका लागि त्रिवि शिक्षण अस्पताल पठाईएको छ ।
यसैबीच, हत्यामा संलग्न भएको आशंकामा प्रहरीले महतको श्रीमतीसहित दुई जनालाई पक्राउ गरेको छ । पक्राउ पर्नेमा मृतक महतको श्रीमती ओखलढुंगाको मानेभन्ज्याङ गाउँपालिका–९ माधवपुर घर भएकी २४ वर्षीया उषा सार्की र सोही स्थानका २७ वर्षीय मदन रम्तेल रहेका छन् ।
