काठमाडौं । प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दहाल प्रचण्ड र प्रमुख प्रतिपक्षि दल नेकपा एमालेका अध्यक्ष केपी शर्मा ओलीबीच आज भेटवार्ता हुने भएको छ ।
प्रधानमन्त्री निवास बालुवाटारमा आज दिउँसो ४ बजे उनीहरुबीच भेटवार्ता हुने प्रधानमन्त्रीको सचिवालयले जनाएको छ । तीन नेताबीचको भेटमा स्थानीय तहको निर्वाचन, अमेरिकी सहयोग सम्बन्धी सम्झौता एमसिसि लगायतका विषयमा छलफल हुने बताइएको छ । प्रधानमन्त्रीबाट हटेपछि एमाले अध्यक्ष ओली आज पहिलो पटक बालुवाटार जानुहुने भएको हो । स्थानीय तहको निर्वाचन र एमसिसिको विषय पेचिलो बनीरहेका बेला तीन शिर्ष नेताहरुबीच हुन लागेको भेटवार्तालाई महत्वका साथ हेरिएको छ ।
