नुवाकोटको शिवपुरीमा हेलिकप्टर दुर्घटना हुँदा ४ जनाको मृत्यु भएको छ ।
काठमाडौँबाट रसुवाका लागि उडेको एयर डाइनेस्टीको जहाज दुर्घटना हुँदा चार जनाको मृत्यु भएको हो । नुवाकोट प्रहरी प्रमुख एसपी शान्तिराज कोइरालाले शिवपुरी ७ सूर्यचौर क्षेत्रमा हेलिकप्टर दुर्घटनामा परेको पुष्टि गर्नुभयो । उहाँका अनुसार हेलिकप्टर दुर्घटना स्थलमा आगलागी भइरहेको र उद्धार कार्य जारी रहेको छ । सुरक्षाकर्मीको ठूलो टोली सो स्थानमा पुगेर उद्धारको काम भइरहेकाले थप विवरण आउन बाँकी रहेको प्रहरीले जनाएको छ ।
रसुवाको स्याफ्रुबेसी गएको एयर डाइनेस्टीको दर्ता नम्बर ९एन-एजेडी हेलिकप्टर नुवाकोटको सूर्यचौर पुगेपछि वेपत्ता भएको थियो । हेलिकप्टर १ बजेर ५४ मिनेटमा काठमाडौंबाट उडेको त्रिभुवन विमानस्थल स्रोतले जनाएको छ ।
