काठमाडौं । राष्ट्रिय प्रजातन्त्र पार्टीबाट अलग भएका कमल थापा राप्रपा नेपालको अध्यक्ष बनेका छन् ।
थापा निर्वाचन आयोगमा पहिले नै दर्ता भएको राप्रपा नेपालको अध्यक्ष बनेका हुन् । राप्रपाबाट अलग भएको घोषणासँगै नयाँ नाममा पार्टी दर्ता गर्ने तयारी गरेका थापाले पुरानै राप्रपा नेपाल ब्युँताएका हुन् । थापाले विज्ञप्ति जारी गर्दै राप्रपा नेपाललाई ब्युँताउने जानकारी दिएका छन् । राप्रपा नेपालको घोषणा सभा फागुन ७ गते काठमाडौंमा हुने विज्ञप्तिमा उल्लेख छ । विगतमा कमल थापाले स्थापना गरेको राप्रपा नेपाल २०७३ सालमा पशुपति शमशेर राणाले नेतृत्व गरेको राप्रपासँग एकता गरेर राष्ट्रिय प्रजातन्त्र पार्टी निर्माण भएको थियो ।
त्यसपछि राप्रपा नेपालको नाममा निर्वाचन आयोगमा दर्ता भएको पार्टीको अध्यक्ष लाक्पा शेर्पा बनेका थिए । शेर्पाले पार्टीको नेतृत्व त्याग्दै थापालाई अध्यक्षमा चयन गरेसँगै उनी राप्रपा नेपालका अध्यक्ष बनेका हुन् ।
