हाम्रो अपडेट 
काठमाडौं । सर्वोच्च अदालतले काभ्रेपलाञ्चोकको पाँचखाल नगरपालिकामा सञ्चालित इँटाभट्टाहरू बन्द गर्न आदेश दिएको छ ।
पर्यावरण र जनस्वास्थ्यलाई गम्भीर असर पारेको भन्दै पाँचखाल नगरपालिकामा सञ्चालित इँटाभट्टाहरू बन्द गर्न सर्वोच्चले आदेश दिएको हो । स्थानीयले पर्यावरण र जनस्वास्थ्यलाई गम्भीर असर पारेको भन्दै अदालतमा परमादेश जारी गरेका थिए । इँटाभट्टा बन्द गर्न माग गरिएको रिट निवेदनमा पाँच वर्षपछि २०८१ साल चैत १२ गते सर्वोच्चका न्यायाधीश हरिप्रसाद फुयाल र शारङगा सुवेदीको इजलासले माग बमोजिम हुने फैसला गरेको हो ।
पाँचखाल नगरपालिका, वन तथा वातारण मन्त्रालय, शिक्षा मन्त्रालय, पुरातत्व विभाग लगायतलाई विपक्षी बनाइ स्थानीय र स्थानीय अभियन्ता श्रीकृष्ण धिमाल लगायतले २०७६ साल पुस १४ गते सर्वोच्चमा रिट निवेदन दर्ता गरेका थिए । रिटमा इँटाभट्टा मापदण्ड पूरा नगरी सञ्चालन हुँदा प्रदूषण बढेको, इँटाभट्टाले प्रयोग गर्ने माटो उत्खननले प्राचीन स्मारक तथा पुरातात्विक वस्तुहरूको अस्तित्व समाप्त हुन जाने जोखिम रहेको तथा कृषिजन्य उत्पादन तथा स्थानीयको स्वास्थ्यमा गम्भीर असर परेको जिकिर थियो । पाँचखालमा आठ वटा इँटाभट्टा सञ्चालनमा छन् ।
