काठमाडौं । अवैध लागुऔषध ब्राउन सुगरसहित काठमाडौंको कोटेश्वरबाट काभ्रेपलाञ्चोक एकसहित आठ जना पक्राउ परेका छन् ।
पक्राउ पर्नेमा काभ्रेपलाञ्चोक नमोबुद्ध घर भएका १९ वर्षीय रिसफ श्रेष्ठ, ललितपुरका २७ वर्षीय रफिस अवाले, मोरङ कानेपोखरीका २१ वर्षीय रेमन राई, बेलबारीका ३३ वर्षीय अमितकुमार चौधरी, ३६ वर्षीय प्रमोद राई, पाँचथरको मिक्लाजुङका २८ वर्षीय मेहरमान भुजेल, फिदिमका २७ वर्षीय टिम्पल तामाङ, फाल्गुनन्दका २९ वर्षीय भीमकुमार चेम्जोङ रहेका छन् । काठमाडौं महानगरपालिका–३२ कोटेश्वरमा शंकास्पद गतिविधि गरिरहेको अवस्थामा खानतलासी गरी प्रहरीले उनीहरुका साथबाट ३३ दशमलव ७६ ग्राम ब्राउन सुगर बरामद गरेको हो ।
यस्तै, लागुऔषध ट्रामाडोल आठ ट्याब्लेट, मोटरसाइकल र स्कुटर एक / थान, नगद रु ५५ हजार दुई सय, १४ थान मोबाइल, आइप्याड एक थान, झोला एक थान, तौल गर्ने डिजिटल मेसिन एक थान र पर्स एक थान बरामद गरेको प्रहरीले जनाएको छ ।
