दाङमा खाना पकाउने ग्याँस सिलिण्डर विस्फोट हुँदा दुई जना घाइते भएका छन् ।
तुलसीपुर उपमहानगरपालिका वडा नम्बर १६ को लहलौरास्थित कृषि बीउ उत्पादन कम्पनीमा ग्याँस विस्फोट हुँदा कुसुम केसी र आशिष खनाल घाइते भएका हुन् । खाना पकाउने क्रममा आज बिहान ग्याँस लिक हुँदा सिलिण्डर विस्फोट भएको इलाका प्रहरी कार्यालय तुलसीपुरका प्रहरी निरीक्षक पर्वत केसीले जानकारी दिनुभयो । उहाँका अनुसार घाइते केसीको कम्मरमुनिको भाग जलेको छ भने खनालको दुवै हात खुट्टा जलेको छ । घाइतेमध्ये केसीको राप्ती प्रादेशिक अस्पतालमा उपचारपछि थप उपचारका लागि नेपालगञ्ज लगिएको छ । उनको अवस्था गम्भीर रहेको छ । यद्यपि खनालको अवस्थाको मध्यम रहेको प्रहरीले जनाएको छ ।
