दोलखा । दोलखाको चरिकोट हल सहित विभिन्न २० हलमा आजबाट ‘पुर्ण बहादुरको सारंगी’ फिल्म नचल्ने भएको छ ।
निर्माताले चलचित्र प्रदर्शकले उपलव्ध गराएको कलेक्सन रिपोर्टमा असन्तुष्टी व्यक्त गर्दै मोफसलका २० हलमा आजबाट फिल्म उतार्ने निर्णय गरेको हो । फिल्म निर्माता कम्पनी सेभेन सिजले हिजो साँझ विज्ञप्ती जारी गर्दै दोलखाको चरिकोट हल सहित काठमाडौँ उपत्यका बाहिरका विभिन्न २० हलबाट आजदेखि सिनेमा नचलाउने जानकारी गराएको हो । केही सिनेमा घरहरुले चलचित्र हाउसफुल अकुपेन्सीमा प्रदर्शन भएपनि निर्माण पक्षले ग्रस कलेक्सन रिपोर्टमा असहमति जनाउँदै हलबाट फिल्म उतार्ने निर्णय गरेको विज्ञप्तीमा उल्लेख छ ।
पुर्ण बहादुरको सारंगी फिल्मले उत्कृष्ट कमाई गर्ने नेपाली फिल्मको ईतिहाँस कायम गरिसकेको छ भने सबै भन्दा धेरै शो पाउने फिल्ममा समेत नाम दर्ता गरिसकेको छ । यो फिल्मले एकै दिन सबै भन्दा बढि कमाउने फिल्ममा पनि रेकर्ड कायम गरेको छ । पुर्ण बहादुरको सारंगीले प्रदर्शनको १० औँ दिनमा देशभरबाट ४ सय ६५ शोज नै ‘हाउसफुल’ सहित एकैदिन ३ करोड ९० लाखको कीर्तिमानी व्यापार गरेको थियो ।
