काठमाडौं । वरिष्ठ एवम् चर्चित कलाकार जयनन्द लामाको निधन भएको छ ।
सिन्धुपाल्चोकको बाह्रविसे नगरपालिका वडा नम्बर २ धार्पा घर भएका लामाको भक्तपुरस्थित कौशलटारमा गएराती निधन भएको हो । पाँच दशकअघि गायन यात्रा सुरु गरेका ख्याती प्राप्त कलाकार लामा आज बिहान आफ्नै घर अगाडी गेटमा खुट्टा टाउकोमा चोट लागेको अवस्थामा मृत फेला परेका हुन् । उनले थुप्रै मौलिक लोकगीत गाउनुका साथै चलचित्र र टेलिश्रृखंलामा अभिनय समेत गरेका छन् । लामाले चलचित्र मनको बाध, छक्कापञ्जा लगायत चलचित्रहरुमा पनि अभिनय गरेका थिए । पछिल्लो समय हाँस्य टेलिश्रृंखला हल्का रमाइलोमा अभिनय गर्दै आएका थिए । उनका कलकत्ते काइँयो, चुइँ चुइँ चुइँकने जुत्ता, मुलाको चाना, सलल पानी लगायत थुपै लोकगीतहरु चर्चित छन् ।
