काठमाडौं । भक्तपुरमा टिपरले साइकललाई ठक्कर दिँदा साइकल चालकको मृत्यु भएको छ ।
भक्तपुर नगरपालिका–९ चोखामरु चोकमा टिपरले साइकललाई ठक्कर दिँदा साइकल चालक ६५ वर्षीय आसनारा कोजुको मृत्यु भएको हो । आज खरिपाटीबाट भाने चोकतर्फ जाँदै गरेको बाग्मती ४ ख ४९३१ नं को टिपरले साइकललाई ठक्कर दिँदा गम्भीर घाइते भएका कोजुको उपचारका लागि ख्वपा अस्पताल च्यामासिंह लगिएकोमा उपचारकै क्रममा मृत्यु भएको जिल्ला प्रहरी कार्यालय भक्तपुरले जनाएको छ ।
टिपर चालक सिन्धुपाल्चोकको मेलम्ची नगरपालिका–९ घर भई हाल भक्तपुर भानेचोक बस्ने ३३ वर्षीय अमिर तामाङलाई प्रहरीले नियन्त्रणमा लिएको छ । घटनाबारे थप अनुसन्धान भईरहेको प्रहरीले जनाएको छ ।
