काठमाडौँ । सिन्धुपाल्चोकमा एक सहित मुलुकका विभिन्न स्थानमा ५ जना मृत फेला परेका छन् ।
काठमाडौँमा मात्रै आज एकैदिन सोलुखुम्बुका एक सहित तीन जना मृत फेला परेका छन् । सोलुखुम्वु घर भएका ५२ वर्षीय नरबहादुर राई आज काठमाडौँमा मृत फेला परेका हुन् । उनलाई काठमाडौँको गोकर्णेश्वर नगरपालिका १ सुन्दरीजलस्थित निमा तामाङको घरको आँगनमा मृत फेला पारिएको प्रहरीले जनाएको छ ।
यसैगरी टोखा नगरपालिका १० खरिबोटमा सत्कार खाजा पसल सञ्चालन गर्दै आएका सुनसरीका ५५ वर्षीय अर्जुनकुमार राई आफ्नै पसल अगाडी मृत फेला परेका छन् । काठमाडौँकै दक्षिणकालि सांस्कृति क्षेत्र सुधार समितिको जंगलमा पनि एक पुरुष मृत फेला परेका छन् । यद्धपी उनको भने पहिचान खुलेको छैन ।
यसैबीच, सिन्धुपाल्चोकमा एक वृद्ध मृत फेला परेका छन् । सिन्धुपाल्चोकको सुनकोशी गाउँपालिका ५ रतनकोटका ७० वर्षीय टिका बहादुर विश्वकर्मा मृत फेला परेका हुन् । उनलाई आज जिल्लाकै त्रिपुरासुन्दरी गाउँपालिका ३ तारकेनीस्थित हुन्दुङ खोल्साको किनारमा मृत फेला पारिएको सिन्धुपाल्चोक प्रहरीले जनाएको छ ।
उता, दाङमा पनि एक पुरुषको शव फेला परेको छ । जिल्लाको घोराही उपमहानगरपालिका–१२ डाँडा गाउँका ५२ वर्षीय बुद्धिराम चौधरीको घर नजिकैको कुलोको छेउमा शव फेला परेको प्रहरीले जनाएको छ ।
