भक्तपुर । भक्तपुरमा टिपरको ठक्करबाट काभ्रेपलाञ्चोकका एक युवकको मृत्यु भएको छ भने अर्का घाईते भएका छन् ।
दुर्घटनामा परी काभ्रेको मण्डनदेउपुर नगरपालिका–१ घर भई हाल भक्तपुरको कमलविनायक बस्ने २१ वर्षीय सुवास तामाङको मृत्यु भएको हो । भक्तपुरको मध्यपुर ठिमी नगरपालिका–४ नयाँठिमी स्थित सडक खण्डमा काठमाडौंबाट भक्तपुरतर्फ जाँदै गरेको गण्डकी प्रदेश ७ प ५३५३ नम्बरको मोटरसाइकललाई बागमती प्रदेश ४ ख २९०१ नम्बरको टिपरले पछाडिबाट ठक्कर दिँदा तामाङ गम्भीर घाईते भएका थिए ।
गम्भीर घाईते भएका उनलाई मध्यपुर अस्पताल ठिमी लगिएकोमा उपचारको क्रममा आज बिहान मृत्यु भएको हो । टिपरको ठक्करबाट मोटरसाइकलमा पछाडि सवार काभ्रेकै २० वर्षीय सन्जिव थापामगर घाईते भएका छन् । उनको सोही अस्पतालमा उपचार भइरहेको भक्तपुरका प्रहरीका निमित्त सूचना अधिकारी टेकेन्द्र शर्मा पौडेलले जानकारी दिनुभयो ।
दुवै सवारी साधन र टिपर चालक काभ्रेको मण्डनदेउपुर नगरपालिका–६ का २८ वर्षीय राजकुमार राईलाई नियन्त्रणमा लिइएको छ ।
