काठमाडौं । सेयर कारोबार रकममा हालसम्मकै उच्च रेकर्ड बनेको छ ।
सूचकमा देखिएको निरन्तरको वृद्धिसँगै कारोबार रकमले रेकर्ड तोडेको हो । आज कुल २१ अर्ब ९१ करोड १५ लाख रुपैयाँ बराबरको कारोबार भएको छ । यो सँगै अघिल्लो चरणको बुलको कारोबार रेकर्ड तीन वर्षमा तोडिएको छ । यसअघि २०७८ साउन ३१ मा २१ अर्ब ५३ करोड बराबरको उच्च रेकर्ड बनेको थियो ।
आज सेयर बजारको नेप्से परिसूचक ६४.२५ अंकले बढेर २७६०.९० अंकमा बजार बन्द हुँदा ३२२ वटा कम्पनीको ५ करोड कित्ता सेयर २१ अर्ब ९१ करोड रुपैयाँमा कारोबार भएको हो । आज १९१ कम्पनीको मुल्य बढेको छ भने ४४ कम्पनीको मुल्यमा गिरावट आएको छ । होटल तथा पर्यटन समुहको सूचक हालसम्मकै उच्च भएको छ । सूचक र कारोबारको वृद्धिले ८ वटा कम्पनीको मुल्यमा सकारात्मक सर्किट लागेको छ ।
